Os deputados do PP de Ourense no Congreso Celso Delgado Arce, Rosa Quintana e Ana Vázquez, veñen de recibir a resposta do Goberno con respecto ás preguntas que presentaban o pasado verán para saber, entre outras cuestións. que data compromete o Ministerio de Transportes e Movilidad Sostenible para finalizar as obras do 5,6 km que ten a estrada de conexión entre as nacionais N-120 e N-536 entre Sobradelo e O Barco de Valdeorras, a coñecida como circunvalación do Barco.
Na súa resposta, o Ministerio sinala que “en relación coa pregunta de referencia, indícase que o Ministerio de Transportes e Movilidad Sostenible ten en execución actualmente o 69% das obras do novo vial de conexión Sobradelo- O Barco de Valdeorras (Ourense)”.
A través de nota de prensa, os deputados do PP sinalan que isto “significa que sete anos contados desde que comezou a contar o prazo de execución (21-9-2019) o Ministerio de Transportes e Movilidad Sostenible recoñece que aínda falta por executar o 31% das obras deste vial de 5,6 km. Pero o Goberno negouse a responder as outras concretas preguntas. Non compromete data para finalizar as obras. Non informa sobre a suma certificada (IVE incluído) das obras. Tampouco informa sobre a aprobación pola Dirección Xeral de Estradas, do novo modificado nº 2 das obras e cal sería o importe en euros que incrementaría o custo para o erario público. E elude dar resposta sobre o grao de execución do viaduto do río Cigüeño, do viaduto sobre o río Sil e se xa finalizaron as tarefas de sostemento da embocadura Norte e de revestimento do túnel de O Serro”.