Ata o vindeiro 31 de outubro o Centro Cultural José Ángel Valente (rúa do Paseo, 20) da cidade de Ourense acollerá a exposición “Centenario dos grandes voos da aviación española”. Esta mostra, que está organizada polo Concello de Ourense, o Exército do Aire e do Espazo e a Subdelegación de Defensa en Ourense para conmemorar as grandes xestas dos pioneiros da aviación; inclúe maquetas, equipo aeronáutico e todo tipo de material da época. A mostra inaugurábase coa presenza de diversas autoridades na mañá do 16 de outubro.
Entre eses primeiros aviadores, atopábanse varios galegos. Polas súas fazañas, alcanzaron fama mundial o ferrolán Ramón Franco, piloto do “Plus ultra”, que conseguiu por primeira vez atravesar o Atlántico Sur desde a Península Ibérica, unindo España con Brasil, Uruguai e Arxentina, utilizando un só avión. É de destacar tamén o lalinense Joaquín Loriga, quen formou parte da escuadrilla Elcano. Tres aparellos que voaron en formación entre Madrid e Manila no ano 1926. Outro galego salientable, foi o ferrolán Francisco Iglesias Brage, navegante/enxeñeiro do “Xesús do Gran Poder”, quen en 1929 e despois dun voo de case 44 horas desde Sevilla a Baía (Brasil), realizou a segunda maior distancia mundial e a primeira marca de tempo de voo dun avión terrestre (non hidroavión) sobre o mar.
Os aviadores españois retomaban a ansiada aventura de chegar máis alto, máis lonxe, máis rápido, tras a pausa nos avances da aviación que impuxo a pacificación do protectorado.
Co voo do Plus ultra iniciouse un período no que os avances técnicos correron parellos aos desenvolvementos operativos e isto, unido ao guindo e espírito de superación dos aviadores españois, traduciuse nun importante número de xestas. O seu obxectivo foi posibilitar o desenvolvemento do transporte aéreo, recuperando a ligazón cos territorios que, por atoparse afastados da península e tras os procesos de independencia, distanciáranse progresivamente da que foi a metrópole. Os logros dos aviadores españois víronse recoñecidos coa concesión do premio por excelencia no mundo aeronáutico da época, o premio Harmon, que se poderá contemplar na exposición ourensá.
Pero este non foi máis que o comezo dun fértil período en que os aviadores españois lograrían importantes fazañas, con avances substantivos para a aeronáutica e o transporte aéreo, na que poderiamos cualificar como a década dos grandes voos.
Estes voos requiriron dunha preparación moi detallada, alén de enormes doses de esforzo e coraxe para enfrontarse a situacións moi adversas e descoñecidas ata a data, culminando a empresa tras múltiples penalidades. O comezo da Guerra Civil en 1936 poría fin á que sería talvez a década máis importante da nosa Aeronáutica.
“Podemos afirmar que o impulso dos nosos aviadores foi un paso decisivo para normalizar o emprego da aviación nas tarefas de transporte e ligazón con territorios afastados en América, Asia e África, facilitando o desenvolvemento do comercio e favorecendo a proxección de España sobre estes territorios. A magnitude da empresa á que se enfrontaban estes aviadores, pola pouca precisión dos equipos de navegación, poderiamos considerar que se asemella ao reto ao que se enfronta o ser humano ante a exploración espacial, cada día máis próxima a nós e máis necesaria”, din dende a Subdelegación de Defensa en Ourense.
Deste xeito, a exposición quere recoñecer a “dedicación e sacrificios daqueles que nos precederon poñendo todo o seu esforzo en aras do progreso e os avances científicos. E a iso habemos de sumar o poder de atracción que exerce a aeronáutica sobre o ser humano, particularmente na mocidade, sobre a que o relato destas proezas ha de servir como estímulo para o progreso e avances futuros”, conclúe a Subdelegación de Defensa na provincia.
Conferencia o 22 de outubro
Ademais, no marco da exposición, o próximo día 22 de outubro ás 19.00 horas, no Centro Cultural José Ángel Valente terá lugar a conferencia: “Grandes voos da aviación española” a cargo do Tenente Coronel do Exército do Aire e do Espazo, Marcelino Sempere Domenech. A entrada será libre ata completar o aforo.
Nesta galería de fotos poden verse diversas imaxes da xornada inaugural da exposición o 16 de outubro.
Fotos cedidas.
