Recoñecementos ao sector empresarial da provincia neste 11 de decembro na Gala das Empresas Ourensás 2024, promovida pola Confederación Empresarial de Ourense (CEO). Bandepellet recibiu o premio Empresa Sostible, a Calzados Marfil outorgóuselle o premio Comercio, a valdeorresa Cova da Xabreira foi recoñecida como Empresa Innovadora, a Cooperativa Santa Mariña de Loureiro co premio Responsabilidade Social Empresarial, Gómez y Crespo como Empresa familiar e Redegal co premio José Manuel Pérez Canal á Exportación. O acto reunía a numerosas persoas e autoridades este mediodía na Carballeira de Santa Cruz de Arrabaldo.
O presidente do Executivo galego, Alfonso Rueda, que pechaba o acto, reivindicou a Galicia como unha terra chea de oportunidades para que empresas e individuos sigan prosperando. Durante a súa intervención destacou o labor da CEO e da súa presidenta, Marisol Novoa, durante os seus case 50 anos de actividade.
Ademais, Rueda recoñeceu o traballo das empresas premiadas e expuxo algunhas das políticas nas que o Goberno galego traballa para acompañar ás empresas, especialmente ás pequenas e aos autónomos, para “axudar nos momentos nos que é necesario”. Así, o presidente da Xunta lembrou a eliminación das trabas burocráticas, a creación da Oficina Económica de Galicia “para escoitar e guiar” e así reforzar a dinamización da economía galega, o esforzo por adaptar a oferta formativa, o traballo para o retorno de galegos e galegas no exterior, ou a reedición do Bono Comercio.
O titular do Executivo galego tamén aproveitou a súa intervención para apuntar a algúns dos desafíos aos que se enfronta o tecido empresarial galego, como son o absentismo e as vacantes, así como para solicitar o apoio do sector empresarial para atraer proxectos tractores para a economía galega e seguir sendo unha terra acolledora e de oportunidades.
No acto tamén interviñan a presidenta da CEO e o presidente da Deputación de Ourense, Luis Menor, entre outras autoridades.
Fotos: O SIL.
