Axentes da Policía Nacional pertencentes á Brigada Provincial de Estranxeiría e Fronteiras, daban por finalizada o 14 de febreiro a denominada policialmente como “Operación Laranxa”, procedendo á detención dun matrimonio acusado de empregar de maneira reiterada e irregular a varios cidadáns estranxeiros que non se atopaban habilitados para o desempeño de actividade laboral algunha en España por carecer de permiso de traballo.
Ambos son investigados por delitos contra os dereitos dos traballadores. O detido exercía os labores de encargado dos diferentes establecementos de hostalería onde levaba a cabo a actividade laboral, mentres ela figuraba como administradora única dunha empresa do sector hostaleiro, segundo informa a Policía Nacional.
Ofrecían, a propósito desta imposibilidade derivada das súas respectivas situacións administrativas, unha ocupación laboral a cambio dun soldo previamente pactado sen o correspondente contrato laboral e sen respectar as condicións laborais esixidas pola lei. A investigación contaba coa colaboración da Inspección de Traballo e Seguridade Social na provincia realizándose as correspondentes inspeccións nos diferentes locais afectados. Un destes locais situábase no Concello da Peroxa e o outro na cidade das Burgas.