Chea de recoñecementos chegaba a I Gala do Trail Running Galego, promovida pola Federación Galega de Atletismo e que se celebraba o 10 de xaneiro na Casa da Cultura (Bertamiráns). No seu decurso distinguíase o traballo e os méritos dos deportistas nas distintas especialidades do trail running ao longo do ano 2024, pero tamén a complexidade da organización deste tipo de probas, polo que se incluía un apartado de galardóns á organización do mellor evento, así como premios especiais para a mellor organización a nivel medio ambiente, información, percorrido, ou seguridade, por citar algúns.
Así o Concello de Vilamartín, que estivo representado na gala, resultaba premiado cun diploma a un dos mellores eventos organizados e o premio á proba de mellor seguridade plan e xestión.
Neste mesmo acto tamén era presentada a vindeira edición desta proba valdeorresa, que segue sendo campionato galego de Carreira vertical o próximo 7 de setembro de 2025.