O xurado do concurso de carteis da XIII Feira do Viño de Monterrei reuníase na mañá do 8 de xuño para decidir a imaxe promocional desta edición da mostra. Ao certame, convocado polo CRDO Monterrei, presentábanse un total de 37 traballos de entre os que resultaba elixido o realizado por Diego Gil Hernando e Toño Gutiérrez Sanz.
Os autores desta obra, presentada co lema ‘Brindemos’, son arquitecto de interiores e artista plástico, respectivamente. O xurado encargado de seleccionar o cartel anunciador estivo formado por Cristóbal Boo, vogal e representante do Consello Regulador da D.O Monterrei; Purificación Caldelas, concelleira de Turismo, Comercio, Balnearios e Transportes de Verín; Noelia Manzano, deseñadora gráfica, e Sergio Crespo, experto en fotografía.
