O delegado territorial da Xunta en Ourense, Manuel Pardo, acompañado da alcaldesa de Carballeda de Valdeorras, María del Carmen González, entregaba esta mañá as chaves de dúas vivendas, en réxime de alugueiro, en Sobradelo, nas que a Xunta investiu máis de 13.000€ en obras de acondicionamento e rehabilitación.
O delegado territorial detallou que se trata de dúas vivendas de 87,95 e 90 metros cadrados situadas no lugar a Lagoa, en Sobradelo. As vivendas foron adxudicadas en réxime de alugamento, polo que os seus inquilinos pagarán unha renda mensual que non excede dos cen euros. Xunto coa adxudicación das vivendas, vincúlase unha praza de garaxe e un rocho.
Tamén explicou que as actuacións que se levaron a cabo en ambas vivendas consistiron, principalmente en traballos de carpintería, pintura, reparación de luminarias e colocación de encimeras e placas de cociña.
Manuel Pardo salientaba que as persoas beneficiarias xa se poden instalar nas vivendas e resaltou que estas actuacións son unha mostra máis do esforzo do Goberno galego para facilitar o acceso a unha vivenda aos cidadáns.
Unha desas persoas é Silvia Izquierdo, que se emocionaba ao entrar no que vai ser o seu fogar. “Para min isto signifícao todo”, confesaba ao Periódico O SIL. A outra vivenda é para María Fernanda Jurado, que acudía a entrega das chaves co seu bebé. “Sinto moita felicidade, para mí supón unha indepedencia ter un fogar para o meu bebé e a miña parella”, dicía. As dúas traballan no municipio de Carballeda.
Nesta visita o delegado da Xunta lembraba que unha das condicións que deben cumprir os beneficiarios é estar inscrito no Rexistro único de demandantes de vivenda, un trámite que se pode realizar en calquera momento do ano. A inscrición pode efectuarse a través da sede electrónica da Xunta de Galicia https://sede.xunta.gal/portada, procedemento VI428C, inscrición no RUDEVI. Tamén pode solicitarse información nas propias oficinas do IGVS. As solicitudes poden presentarse opcionalmente por medios electrónicos ou de xeito presencial.
O representante do Goberno galego subliñou que as axudas á rehabilitación de vivendas de titularidade municipal que promove a Xunta teñen como obxectivo seguir incrementando o parque residencial á disposición dos colectivos máis vulnerables con alugueiros a prezos accesibles.
Fotos: O SIL agás as tres primeiras.
Vídeo: O SIL.
