O Consello da Xunta vén de autorizar na súa reunión desta mañá o decreto polo que se aproba o cambio de titularidade a prol do Concello de Vilamartín de Valdeorras do treito da estrada provincial OU-0807 Vilamartín (N-536)-San Vicente.
Trátase, concretamente, do treito de 500 metros de lonxitude da OU-0807, que se inicia no punto quilométrico 8+190 e remata no 8+690. O Concello de Vilamartín de Valdeorras solicitou á Deputación Provincial de Ourense o cambio de titularidade do citado treito da OU-0807.
“A administración provincial aceptou o cambio de titularidade proposto pola entidade local. A Axencia Galega de Infraestruturas, vistos os informes emitidos polos servizos competentes, formulou a proposta favorable ao cambio de titularidade deste treito da estrada provincial Vilamartín (N-536)-San Vicente. A transferencia deste treito a prol do Concello de Vilamartín de Valdeorras tramítase de acordo co previsto na Lei 8/2013, do 28 de xuño, de estradas de Galicia, que establece a súa aprobación por decreto da Xunta, por proposta da Consellería de Vivenda e Planificación de Infraestruturas como competente en materia de estradas, e logo do acordo entre as administracións implicadas”, tal e como informa a Xunta.
O Departamento de Infraestruturas da Xunta ten entre as súas funcións a tramitación dos cambios de titularidade das estradas incluídas nas redes dependentes da comunidade autónoma e das entidades provinciais e locais.
“Con este cambio de titularidade, o Concello de Vilamartín de Valdeorras terá a competencia para actuar neste treito da estrada provincial OU-0807, e asume a responsabilidade da súa conservación e mantemento”, segundo a Xunta.
O decreto aprobado hoxe polo Executivo autonómico producirá efectos desde o día seguinte ao da súa publicación no Diario Oficial de Galicia.
