Arredor das catro desta madrugada o 112 Galicia recibía un aviso dun incendio en Ribas de Sil (Lugo). Producíase nun local de hostalaría, situado en Rairos, na estrada N-120, no punto quilométrico 496. “Afortunadamente, non houbo que lamentar danos persoais, iso si, os Bombeiros de Monforte, tras rematar a súa intervención, comunicaron ao 112 que ardera a adega e parte da estancia que utilizaban como almacén. Engadiron, ademais, que o local resultara afectado polo fume”, segundo informa o 112 Galicia.
O mesmo dono do establecemento foi quen contactou co 112 para pedir axuda. Indicaba que lle ardía o almacén no que había conxeladores e que non había persoas afectadas.
Con estes datos, os xestores de emerxencias puxeron os feitos en coñecemento dos Bombeiros de Monforte que decontado se desprazaron ao punto. Do mesmo xeito, pasaron aviso aos membros do GES de Quiroga, á Garda Civil e aos efectivos da Agrupación de Voluntarios de Protección Civil de Ribas de Sil. Pasadas dúas horas, os medios de extinción deron por rematada a súa intervención.
