Segue medrando e incorpora novos concellos do rural. Entre os lugares aos que por primeira vez chegará o Atlántica, o Festival Internacional da Narración Oral, figura A Pobra de Trives. O seu programa, que se desenvolverá do 1 ao 9 de xullo, presentábase esta mañá en Santiago, nun acto que contaba coa presenza do director xeral de Cultura, Anxo M. Lorenzo. Como cada ano, as funcións desenvolveranse en lugares ao aire libre e de especial interese patrimonial de 24 localidades de toda Galicia.
O representante da Consellería de Cultura, Educación, FP e Universidades felicitou á organización “por ter convertido nos seus máis de dez anos de vida esta cita en todo un referente da narración oral e internacionalizando esta tradición”. Destacou, ademais, a capacidade de Atlántica por “descentralizar a actividade cultural galega achegando propostas ao rural con iniciativas para todos os públicos” e amosou a satisfacción da Xunta por “colaborar e facer posible un mar de contos por toda Galicia”.
Na presentación tamén participou a directora do festival, Soledad Felloza, así como representantes institucionais e das diferentes localidades onde se realiza a programación. En total celebraranse 42 espectáculos que chegarán a 24 sedes repartidas polas catro provincias galegas e representaranse máis de 80 funcións.
Concellos participantes
Este ano participan en Atlántica os concellos da Coruña, Alfoz, Boiro, Brión, Carnota, Castro de Rei, Cuntis, Chantada, Dodro, Ferrol, Mondoñedo, Mugardos, Outes, Ourense, Paderne, A Pobra de Trives, A Pobra do Caramiñal, Rianxo, Ribeira, A Estrada, Santiago de Compostela, Sanxenxo, Teo e Vigo. A esta listaxe cómpre engadir a devandita sede portuguesa de Pitões das Júnias, en Montalegre.
Ademais, os contos do festival volverán soar en lugares emblemáticos do patrimonio galego: o Castelo de Castrodouro en Alfoz, o Centro de Interpretación de Cadoval en Mugardos, o Pazo de Goiáns de Boiro ou nos castros de Castrolandín en Cuntis ou de Viladonga en Castro de Rei, entre outros. Tamén en lugares tradicionais de traballo, como a eira de Traxeito en Dodro, os lavadoiros de Penisqueira en Ribeira e o de Bendimón en Outes, a Carpintería de Ribeira en Broña así como carballeiras, campos da festa ou muíños. A programación está dispoñible na web do festival.
