Outono é sinónimo de pinchos na cidade de Ourense. A 10ª edición do Concurso de Pinchos Sabores de Ourense-Pinchos de Outono xa está en marcha dende hoxe, 30 de outubro, até o 12 de novembro. Este ano increméntase a participación con 46 establecementos, xa que 12 o fan por primeira vez nesta edición. O certame está convocado polo Concello de Ourense e a Unión de Hostaleiros Ourensáns (UHO).
A meirande parte están situados entre a zona do Ensanche e os Viños, aínda que tamén hai catro locais situados ao outro lado do Miño, no barrio da Ponte.
O importe máximo dos pinchos é de 2,50 euros. No eido dos premios, serán os 3 outorgados polo xurado profesional, os 3 concedidos polo público e o Premio Pincho Celíaco, outorgado pola delegación ourensá da Asociación Galega de Celíacos, ao que optarán todos os pinchos que non empreguen glute na súa elaboración.
