Cun marcado toque satírico, como non podería ser doutro xeito nestas datas, os veciños de Seixalbo despedían este insólito Entroido 2021 cunha acción sorpresa: instalando máis de un quilómetro de Fibra Óptica.
“Fartos de esperar pola instalación que o concello paralizou a finais de 2016 por falta de licenza municipal, varios veciños e veciñas optaron por crear os seus propios equipos de instaladores que encheron todo o casco histórico da vila con fibra óptica de banda ancha, de colores amarelo e negro emulando a equipación do club de fútbol “Rápido de Bouzas” en alusión á velocidade que leva o despregamento desta infraestrutura na localidade”, tal e como relatan dende a Asociación Veciñal San Breixo de Seixalbo.
Ademais as figuras de referencia deste Entroido ourensán, os mecos Paquita, Nicanor e Vicentiño; tamén foron retiradas da Praza Maior, onde estiveron estes días, nesta ocasión disfrazados como homenaxe ao incansable labor do persoal sanitario.
Deste xeito, Seixalbo dá por finalizado o Entroido 2021, “coa esperanza de que no vindeiro ano se poida retomar unha das actividades festivas con máis arraigo na vila”.
Fotos: Asociación Veciñal San Breixo de Seixalbo.
