O Hospital Universitario de Ourense acollerá durante o mes de agosto a exposición fotográfica “Aporta saúde” para conmemorar o vinte e cinco aniversario de voluntariado sanitario da Fundación Vicente Ferrer na India rural. Esta exposición que estará situada no vestíbulo principal do Hospital Universitario de Ourense pretende dar a coñecer o traballo e testemuños do persoal sanitario voluntario desta fundación e visibilizar o seu labor durante estes 25 anos e sumar máis persoas ao proxecto de sanidade da ONG.
Un dos grandes retos na India é garantir o acceso a unha sanidade de calidade para todas as persoas e concienciar sobre hábitos saudables. A Fundación creou unha rede de hospitais xerais e clínicas rurais nas zonas máis remotas do sur da India. O papel do voluntariado médico e sanitario foi clave para consolidar esta estrutura sanitaria. A acción da organización alcanza a 3.819 pobos e a preto tres millóns de persoas.
O Hospital de Bathalapalli, un dos proxectos máis emblemáticos da organización, foi o inicio en 1997 da chamada a profesionais da saúde para axudar a mellorar os seus servizos. A partir de entón, máis de 500 profesionais formaron parte do voluntariado sanitario da Fundación Vicente Ferrer, un colectivo indispensable para levar a mellor atención sanitaria á poboación máis vulnerable e ás aldeas máis remotas do sur da India.
O 99% das persoas que traballan na Fundación na India son autóctonas. Por iso, o voluntariado alí responde a perfís profesionais moi concretos e desempeña tarefas complementarias ou que non poden ser asumidas por persoal autóctono. Realiza principalmente tarefas de formación e atención de pacientes e cirurxías durante períodos concretos, un labor crave para lograr unha asistencia de calidade e mellorar a vida das poboacións rurais. Actualmente a organización ten necesidades específicas en perfís de voluntariado de xinecoloxía, pediatría, fisioterapia, medicina interna, enfermería, odontoloxía, cirurxía, e técnicos e técnicas de laboratorio.
A Fundación Vicente Ferrer é unha Organización Non Gobernamental de Desenvolvemento comprometida desde 1969 co proceso de transformación de zonas rurais en Andhra Pradesh e Telangana (sueste da India). Apoia a comunidades empobrecidas e grupos especialmente vulnerables: infancia, mulleres e persoas con discapacidade. Aplica os seus programas en máis de 3.800 pobos e apoia a preto de tres millóns de persoas. O modelo de desenvolvemento da FVF na India coincide co conxunto de propostas globais da ONU para alcanzar os Obxectivos de Desenvolvemento Sostible (ODS) en 2030.