Desolación, impotencia e un fondo sentimento de tristura entre os gandeiros e agricultores, principalmente do Macizo Central, que esta mañá de 19 de marzo concentrábanse novamente en Palleirós (Manzaneda) en apoio á granxa desta aldea, na que se rexistraban tres positivos en tuberculose bovina. Catro días despois de que a xuntanza do venres lograse paralizar a marcaxe de gando vacún para o matadoiro dentro do baleirado sanitario previsto, desta volta o proceso si se podía en marcha, e os responsables de Sanidade Animal da Consellería do Medio Rural iniciaban a marcaxe das reses.
Os dous responsables da explotación sentían novamente o respaldo do sector, pero desolados, asistían ao inicio do procedemento, con consecuencias económicas moi elevadas para eles, pero tamén emocionais por ter que sacrificar, e dun xeito que lamentan, a todo o seu gando.
“Estes gandeiros séntense indefensos porque non lles permitiron diferenciar a unidade de rabaño e porque ven que con este baleirado sanitario obrigatorio van perder máis de 30.000 euros e tamén porque toda a carga emocional téñena que afrontar sós porque a administración só asina sentenzas e impón sancións. Estes compañeiros séntense indefensos porque teñen que cargar con todo o traballo, levar os animais ao matadoiro, buscar a infraestrutura de transporte e malvender”, dicía o representante do Sindicato Labrego, Anxo Pérez, durante a concentración, indicando ademais que deberán agardar dous anos “para volver a producir. Este compañeiros séntense indefensos porque a Consellería non defende os intereses dos labregos e labregas de Galicia”.
A concentración e o inicio da marcaxe realizábase sen ningún tipo de incidentes. A Garda Civil estivo presente, pero non foi necesaria a súa intervención.
Fotos: Carlos G. Hervella.
