A promoción dos recursos naturais e patrimoniais de San Xoán de Río. Esta é a finalidade do I Concurso de deseños de camisetas convocado por #RíoMola F.S. Este club deportivo recibía ducias de propostas entre as que, finalmente, o xurado designaba gañadora a presentada por José de San Xulián. No seu deseño incluía o lema de #RíoMola sobre a silueta da extensión do concello de San Xoán de Río e integraba, “con gran habilidade, varios dos elementos que definen o noso concello como a espada de Mouruás, o pombal de Domecelle, a Ponte Navea, a Fraga de Río, etc.”, segundo se explica dende esta entidade deportiva.
Está previsto que antes da Semana Santa saian xa á venda as camisetas con este deseño. Con elas “pretendemos, por unha banda, dar a coñecer elementos do noso concello que pasan desapercibidos para moita xente, como os miliarios que marcaban a Vía Nova, a Ponte Navea, o Pombal de Domecelle, o Observatorio astronómico, etc. Por outra banda cunha camiseta barata e accesible para todo o mundo queremos que para as festas nos concellos veciños, rutas das covas, etc, toda a xente de San Xoán de Río leve esta camiseta e así as persoas a simple vista a asocien co noso concello”, explican dende #RíoMola.
A iniciativa está tendo moi boa acollida. Mostra diso é a positiva resposta recibida a través das redes sociais. “Nas primeiras 24 horas que abrimos as reservas de camisetas a través das redes sociais máis do 10% da poboación de Río solicitou unha”, aseguran dende o club.
Imaxes cedidas por: #RíoMola FS.
