Unha capitalidade compartida por municipios de Ourense: Manzaneda, A Pobra de Trives, San Xoán de Río e Chandrexa de Queixa vén de ser nomeada oficialmente “Capital Española das Montañas” para o ano 2024. Este anuncio realizábase durante as últimas xornadas celebradas en Candelario, capitalidade do ano 2023 no desenvolvemento dun evento que se dedicou ao turismo deportivo e as experiencias turísticas nos municipios de montaña.
A elección desta zona de Ourense como Capital Española das Montañas representa non só un impulso para o turismo rexional, senón tamén un modelo a seguir en canto a desenvolvemento turístico sostible e responsable en convivencia coas actividades tradicionais. Dentro deste grupo de localidades ou concellos que conforman esta capitalidade, “destaca o seu compromiso e interese pola preservación ambiental, así como polas tradicións de actividades como a gandeira, o fomento da cultura local e novas apostas no campo do turismo e actividades ao aire libre”, segundo a Asociación Española de Municipios de Montaña.
A designación destes municipios como Capital Española das Montañas 2024 é unha formulación nova que a executiva de esMontañas celebrada onte 16 de novembro valorou para que o ámbito de “capitalidade” fóra máis aló do municipio, de maneira que este territorio conforma un espazo representativo dunha zona determinada de montaña. En concreto, está situada na Ribeira Sacra Ourensá, onde conviven terreos de alta montaña cun clima propiamente mediterráneo.
Entre os catro concellos está a Estación de Montaña de Cabeza Grande de Manzaneda, única estación de esquí de Galicia e con actividades durante todo o ano, combinado con actividades tradicionais do territorio.
Durante o ano 2024 estes municipios acollerán unha serie de eventos e actividades relacionadas co montañismo, o turismo deportivo e cultural, a relación dos seus habitantes coa contorna, así como a convivencia dos labores tradicionais, o desenvolvemento económico e a preservación.
Nas xornadas de Candelario, expertos e representantes do sector turístico debateron sobre como potenciar o turismo en pequenas localidades de montaña, resaltando a necesidade de promover prácticas sostibles e respectuosas coa contorna, ademais de lembrar a achega que teñen estes municipios á hora de conseguir frear o cambio climático.
No acto de inauguración, que abriu o anfitrión, o alcalde de Candelario, Pablo Hernández, quen agradeceu a colaboración con esMontañas neste ano de capitalidade, interveu Miguel Gracia, presidente de esMontañas, quen resaltou que “somos destinos das grandes urbes onde se nos valora e necesitan os nosos territorios como zonas verdes desas grandes cidades, ademais achegamos espazos de conservación e preservación, engadido a recursos necesarios para a sustentabilidade. Todo iso tamén require de compensacións ao territorio”. O director xeral de deportes de Castela e León, Enrique Sánchez-Guilo referiuse á a importancia das actividades realizadas ao aire libre para a difusión do territorio á vez que resaltou os beneficios tanto económicos como para a propia saúde.
O deporte como panca de desenvolvemento para os pobos de montaña foi o tema para desenvolver na primeira mesa redonda, moderada pola tenente alcalde de Sobrescobio (Asturias), Tensi Carmona. Participaron Félix Jordán de Urríes, director da Fundación Deporte Novo do Consello Superior de Deportes; Sergio Rivas, xerente de Prames e Manolo Bara, presidente de Peña Guara, José Luis Bergua, concelleiro de deportes de Aínsa, e José Antonio do Álamo, promotor da Marcha Cicloturista Bedelalsa.
O xerente do grupo local ADRISS, Juan Bautista, moderou a segunda mesa, titulada “Pequenas ideas para xerar grandes experiencias turísticas”. Alí coñecéronse ideas innovadoras e estratexias para atraer a turistas nacionais e internacionais: ‘12 meses, 12 fitos’, ‘O roteiro do ratiño Pérez’, ‘Torrearte’ ou as ‘Visitas teatralizadas’ a Candelario.
Antes do acto de clausura, fíxose entrega da I Copa esMONTAÑAS, Álvaro García, o corredor de Béjar que se proclamou o gañador da Speed Trail da EDP Sobrescobio Redes Trail 2023 e estableceuse un faladoiro con Miguel Ángel Heras e Guillermo Ramos. Os tres deportistas salmantinos que se referiron á súa experiencia de deportistas no territorio, e a contribución deste tipo de probas á difusión do territorio, ao impulso de valores humanos como a convivencia, coñecemento e respecto do medio natural, entre outros elementos propios da práctica deportiva, como é o propio beneficio para a saúde.
