“É algo que se palpa na rúa, estas eleccións son unha oportunidade histórica para Galiza e para Ourense e esta provincia vai ser unha praza decisiva. E se hai unha parte de Galiza que precisa un cambio, esa é esta provincia, onde tamén hai débedas de décadas e de abandono coa comarca de Valdeorras”, destacaba no Barco, Noa Presas, cabeza lista do BNG por Ourense, nun mitin no que estaba acompañada polo voceiro do BNG no Barco, Suso Vilasánchez; pola alcaldesa da Rúa, María Albert; e pola senadora Carme da Silva.
Era Suso Vilasánchez quen se encargaba de abrir o acto, que se desenvolvía no edificio multiusos da vila, quen incidía na importancia de que os políticos teñan unha historia detrás porque “se pode revisar e referenciar” e eu son un “bo avalista moral de Noa Presas”, aseguraba. Tras el tomaba a palabra a alcaldesa da Rúa, quen facía un repaso polas dificultades de Valdeorras en eidos como o das infraestruturas ou o dos servizos públicos, con expresa referencia á sanidade. “Valdeorras ten moitas demandas que veñen de lonxe e cada vez están máis ancladas. E esta é unha política que ten que rematar a partir do 18 de febreiro, se a xente quere un cambio neste país, hai que votar ese día porque ese cambio vai ser real e posible”.
Nesa mesma idea incidía a senadora Carme da Silva, “o 18 de febreiro vai ser unha data para facer historia, vai haber un cambio de rumbo total no goberno galego”. Ademais referíase á necesidade de que Valdeorras, como entrada a Galicia, mellore as súas infraestruturas, viarias e ferroviarias, e facía unha referencia expresa á situación que presenta a N-120, “é esencial para esta comarca e non é de recibo o estado no que se atopa”.
Despois dela, a cabeza de lista por Ourense, Noa Presas, destacaba que dúas son as opcións nestas eleccións galegas: “continuar con catro anos máis de PP ou un cambio político liderado por Ana Pontón. Xogámonos moito. Este é o momento e nós temos unha alternativa. Por vez primeira imos ter unha presidenta nacionalista coas mans libres para defender os intereses dos galegos e das galegas”.
Entre os proxectos que defende o BNG, Presas avanzaba a creación dunha Axenda Territorial Galega (ATG) para impulsar un plan específico que contribúa ao desenvolvemento social e económico da comarca de Valdeorras. Ademais de comprometerse á restitución da Área Sanitaria de Valdeorras, unha unidade de pneumoloxía e silicose, así como un plan de choque de Atención Primaria.
“O Partido Popular”, dicía a cabeza de lista, “leva anos póndose de perfil e non escoitando as demandas da veciñanza. De facto, nos Orzamentos da Xunta nunca existe un verdadeiro compromiso coa mellora da OU-533. No BNG non imos pórnos de perfil. Comprometémonos a dotar dos recursos económicos necesarios para mellorar esta vía e construír ese terceiro carril”, indicaba. Por outra parte, Presas comprométese a –desde o goberno galego do BNG- pór en valor a serra da Enciña da Lastra tan esquecida polo Partido Popular e impulsará a rexeneración dos ríos galegos e, no concreto, os da comarca de Valdeorras.
A cabeza de lista aseguraba que unha das primeiras medidas que o goberno do BNG fará en materia sanitaria será a modificación do Decreto que regula as Áreas Sanitarios e os Distritos Sanitarios para recuperar a de Valdeorras: “para que volva ter capacidade de decisión, para que sexa resolutiva e para que teña un orzamento específico que permita garantir unha sanidade pública de primeira”.
E resaltaba que “hai que blindar os dous hospitais comarcais de Ourense e crear unhas condicións atractivas para que os profesionais veñan aquí a facer o seu proxecto de vida”. Tamén poñía sobre a mesa a necesidade de dotar a Valdeorras dunha ambulancia de soporte vital avanzado, “é algo esencial”. Presas concluía asegurando que o BNG ten “as mans libres para negociar por Galiza, para facer ese proxecto de país, temos experiencia e canteira e temos proxecto para un país que está cheo de oportunidades”.
Fotos: A.R.
