Era moi habitual velo pasear polas tardes pola zona vella do Barco ou polo Malecón, acompañado polos seus amigos. Julio Fernández Arias “Julín”era un namorado da súa vila e unha persoa moi involucrada tanto na súa actividade deportiva como no eido nos festexos. Criouse á beira da estrada xeral, na rúa Marcelino Suárez, onde o seu pai Andrés tiña unha panadería.
Foi concelleiro socialista en dúas etapas moi diferentes, primeiro a finais dos anos 80 e, logo, xa asumía a carteira de Deportes entre o 2011 e o 2015. “Aínda que non estivera na primeira liña, era unha das persoas que sempre estaba na sombra dentro do partido”, explica Eduardo Ojea, compañeiro de corporación nese mandato e amigo persoal de Julio Fernández.
Foi precisamente o mundo do deporte o que facía públicas as súas condolencias polo seu falecemento a través dun comunicado do CD Barco nas redes sociais. “A Directiva e todos/as os integrantes do Centro de Deportes Barco manifestan a súa fonda dor polo pasamento de don Julio Fernández Arias. Julín, como era coñecido por todo o mundo na vila do Barco, foi un dos pais fundadores do club e, como tal, mantivo unha estreita ligazón con esta casa dende os seus comezos”.
Así mesmo, o club lembra que foi “presidente da xunta directiva e, máis tarde, o artífice da creación das primeiras escolas de fútbol base no Barco (1983-84) da man do club Atlético Sil, conseguindo a implicación dos centros escolares e de moitos negocios e empresas pra o patrocinio dos equipos de rapaciños. Daquela experiencia sairían logo moitos xogadores, algúns deles moi salientábeis, que defenderon a camisola do CD Barco dende as categorías inferiores até o primeiro equipo”.
Dende o CD Barco tamén destacan o seu “carácter afábel, aberto e sempre colaborador. Mandámoslle o noso sentido pésame e mais o noso agarimo á súa familia e a todos os seus seres queridos. Vaia con el, tamén, a nosa gratitude e o recoñecemento polo intenso traballo desenvolvido dentro e fóra do club”.
Julio Fernández, que estaba casado e era pai de dous fillos, falecía o pasado venres 22 de decembro aos 74 anos en Vigo e era enterrado o sábado 23 de decembro no cemiterio da súa vila natal, O Barco.