Milleiros de persoas dábanse cita este mediodía no Parque Municipal do Carballiño para desfrutar dun manxar moi especial na 64ª Festa do Pulpo desta localidade, que neste domingo celebraba o seu día grande. Nesta xornada, na que vila se converte nun referente do turismo gastronómico, estímase que se chegan a consumir uns 50.000 quilos de polbo á feira.
O acto inaugural desta festa contaba coa asistencia do alcalde en funcións do Carballiño, José Castro-Gil; o concelleiro de Turismo, Manuel Dacal, así como o resto do goberno municipal, ademais do presidente do Parlamento de Galicia, Miguel Santalices; o conselleiro de Emprego, José González; do director de Turismo de Galicia, Xosé Manuel Merelles, e do deputado de Representación Institucional da Deputación de Ourense, Rosendo Fernández, entre outras autoridades, como o delegado da Xunta en Ourense, Manuel Pardo.
Ademais, esta edición a Festa do Pulpo do Carballiño estaba dedicada nesta ocasión á illa canaria de Lanzarote polos lazos históricos que unen aos dous territorios, e tamén se contaba con representación deses lugares.
Con esta xornada poñíase o broche de ouro a 21 días de programación cultural e lúdica, nos que pasaron pola vila milleiros de persoas que desfrutaron de concertos, teatro, actividades infantís e citas tan especiais como a elaboración da tapa de pulpo máis grande do mundo ou a Festa das Camisetas. Desde primeiras horas desta mañá, o Parque Municipal e as principais rúas do Carballiño enchéronse de visitantes que querían degustar a xoia gastronómica: o pulpo á feira. De feito, ao longo da xornada cocéronse máis de 50 toneladas de pulpo.
José Castro-Gil, alcalde en funcións do Carballiño, e Manuel Dacal, concelleiro de Turismo, destacaron o éxito de participación da Festa do Pulpo, que cada ano recibe a máis visitantes chegados desde diferentes partes do mundo. No acto inaugural, Castro-Gil recordou que “O Carballiño é a vosa casa” e agradeceu a presenza de amizades de Lanzarote, Noventa Padovana (Italia), Mogán e Sevilla. Pola súa parte, Dacal puxo en valor o “gran traballo” das pulpeiras e pulpeiros, que manteñen a tradición gastronómica xeración tras xeración. “Grazas ao traballo de todos eles, hoxe veñen a visitarnos milleiros de persoas”, resaltou. Dacal tamén se referiu ao importante recoñecemento de Festa de Interese Turístico Internacional, acadado en 2022.
A xornada, como é habitual, reuniu gastronomía, artesanía, música e tradición no Parque Municipal. O entorno do palco da música acolleu o Festival Folclórico de Música e Danza Tradicional, onde actuaron Oviravai, Pataghullos e Ardentía. Ademais, Feitizo de Pau, Os Serandeiros, Feixoada e a Banda de Gaitas Os Catro Ventos ambientaron as tabernas e zonas de comida. Este ano, por primeira vez, o Concello habilitou unha zona pública de mesas e bancos.
Por outra banda, nas Barcias celebrouse a Festa da Xuventude, onde se reuniron milleiros de persoas para desfrutar coa música de DJ Ballesteros, a discomóbil galega A Gramola, Codeso, Saúl Gallego, Nico Batea, Diego Valeiras, Rivero, Aitor Alfonsín, Javii, Ivi Bralo, Dúo y Medio, Dris, Sergito, De Melo e Mencler.