Suma e segue. O CD Córgomo Vilamartín vén de sumar a quinta vitoria da tempada e continúa invicto, provisionalmente líder do grupo en Primeira Futgal.
Na tarde deste sábado 10 de outubro, os valdeorreses enfrontábanse en casa, no campo municipal do Bañadoiro, ao Polígono San Cibrao, dispostos a sumar os tres puntos en xogo tralo empate a dous a pasada xornada en Celanova, e facíano con creces.
Dominando o xogo, Peke abría o marcador para o Córgomo no minuto 23, e David Álvarez marcaba o segundo no 42, chegando ao descanso co 2-0. Tralo paso polo vestiario mantíñase o xogo moi intenso e dinámico, sendo de novo Peke quen marcaba para os locais preto xa do final, no 90′, sentenciado o encontro co 3-0.
O CD Córgomo Vilamartín-Polígono San Cibrao era un dos partidos adiantados da xornada 6, quedando a clasificación cos valdeorreses no alto da táboa. O seguinte partido será no campo do CD La Purísima.
Fotos: Mónica G. Bellver.