O creador da mellor hamburguesa de España volve a Verín. Martín Fernández, chef ourensán á fronte de Bágoa Gastrobar, regresará ao Enredo o vindeiro venres 25 de setembro, poucos meses despois de conquistar o primeiro posto no campionato nacional coa súa SaboRosa. Nesta ocasión, volverá poñerse aos fogóns do local cunha hamburguesa pensada especialmente para a cita.
Para a súa volta ao Enredo, Martín prepara unha receita diferente. Brioche artesán, pepinillos caseiros, vaca madurada, bacon, cebola e salsa Bágoa serán os ingredientes dunha hamburguesa que manterá a filosofía que caracteriza a súa cociña: bo produto, sabores recoñecibles e unha elaboración na que cada ingrediente ten o seu sitio.
Para a ocasión, a hamburguesa terá tamén nome propio: MEGA (Make Enredo Great Again). O nome recolle o espírito dun slogan convertido en fenómeno global e reinterpretado en innumerables memes e versións na cultura popular, pero tamén fai unha chiscadela directa ao universo de Bágoa: Make Ourense Great Again, a frase que caracteriza o merchandising oficial do gastrobar.
Non será a primeira vez que Martín pase pola cociña do Enredo. En outubro de 2025, o chef visitou por primeira vez Verín para trasladar ao local a súa maneira de entender a gastronomía, baseada nas raíces familiares, no produto local e nunha visión contemporánea da cociña galega.
Desde aquela, a traxectoria do chef deu un novo salto. A súa SaboRosa foi elixida en marzo como mellor hamburguesa de España cunha receita que reivindica expresamente o produto e os produtores galegos. A proposta resume boa parte da filosofía que Martín desenvolve á fronte de Bágoa Gastrobar: afastarse de artificios e demostrar que un produto de calidade, ben tratado, pode ser suficiente para construír unha hamburguesa excepcional. Unha forma de entender a gastronomía que reivindica tamén o sector primario e o rural galego.
O venres 25 de setembro, esa maneira de entender a cociña regresará ao Enredo cunha nova receita e unha oportunidade para probar en Verín unha creación do actual gañador da mellor hamburguesa de España. As hamburguesas terán unidades limitadas, por estrita orde de pedido e non se poderán reservar previamente.