Pola súa especial vinculación con Ourense, en particular co concello de Avión, lazos que cobran máis importancia tendo en conta “a súa traxectoria, proxección internacional tanto en México e América como no resto do mundo”, o empresario mexicano Olegario Vázquez Raña recibía este mediodía o Premio Ourensanía 2024. O acto de entrega, que contaba coa asistencia dos presidentes da Xunta de Galicia, Alfonso Rueda, e da Deputación de Ourense, Luis Menor; e do presidente do Parlamento galego, Miguel Ángel Santalices, entre outras moitas autoridades, desenvolvíase no Teatro Principal da capital da provincia e contaba coas actuacións da Real Banda de Gaitas e da Orquesta Sinfónica “Ourensanía”.
Olegario Vázquez Raña, que se amosaba emocionado pola distinción recibida, nacía en Cidade de México o 10 de decembro de 1935, tan só dez anos despois de que a súa familia natural do concello de Avión, chegara a este país. A andaina empresarial da familia comezou coa tenda “Almacenes Vázquez”, un comercio que cos anos transformouse no Grupo Empresarial Ángeles, fundado no ano 1998, un dos conglomerados máis importantes e exitosos de México. Na actualidade, o Grupo Empresarial Ángeles que contén as compañías: Hospitales Ángeles, a cadea de hoteis Caminos Real, Grupo Financiero Multiva, a construtora Prodemex e Grupo Imagen, este último un conglomerado de medios de comunicación.
Durante a cerimonia de entrega do galardón, o presidente da Xunta, poñía en valor hoxe a contribución de toda a emigración, e nomeadamente de empresarios como Olegario Vázquez Raña, á hora de transformar a Galicia nunha terra moderna e con oportunidades para emprender e traballar. “A nova Galicia é un territorio fértil para emprender, traballar e triunfar grazas a esa xente que saíu cando todo estaba máis difícil”.
Apuntaba que “Olegario é un home de mundo que nunca esqueceu as súas raíces; un home Incansable, valente, con valores familiares e gran deportista”, en referencia isto último aos “enormes éxitos” que colleitou na disciplina de tiro olímpico.
O titular do executivo galego valorou como a emigración galega axudou a construír Galicia desde o exterior, ao tempo que tamén se integraban nas súas sociedades de acollida. “El e tanto outros desa Galicia emigrada nos enviaron dende onde estaban traballando duramente a mensaxe que necesitabamos: ‘se nós puidemos nunha terra que nos era estraña ao principio, todo o mundo pode”, subliñou. Neste sentido, puxo en valor o “carácter aberto” da galeguidade que axudou a establecer comunidades fortes e que “busca por enriba de todo a unión”.
Pola súa banda, o presidente da Deputación de Ourense, Luis Menor enxalzou a “conexión emocional” que supuxo a concesión deste galardón, nomeadamente a conexión que vincula á provincia coa emigración: “Ourense é unha provincia emigrante e Olegario Vázquez Raña exemplifica a audacia, o esforzo, o sacrificio e o traballo daqueles que se viron obrigados a deixar a súa terra para buscar un porvir; e aínda atopándoo, nunca esqueceron as súas raíces”.
Por iso, e porque é difícil atopar a unha persoa en Ourense que non teña vínculos coa emigración, “é polo que o Premio Ourensanía deste ano conecta co máis profundo da idiosincrasia ourensá”, expresou o presidente provincial, quen abundou en que a través de Olegario Vázquez Raña, “facemos partícipes deste premio aos milleiros de galegos na diáspora e que desde outros lares contribuíron a manter viva a nosa terra nos momentos máis complicados”.
Menor tamén fixo un repaso á traxectoria vital, empresarial e deportiva do Premio Ourensanía 2024, co tiro olímpico como unha das súas grandes paixóns, xunto á súa familia, o piar fundamental da familia Vázquez Raña. Precisamente, o presidente provincial fixo súas unhas palabras da dona do premiado, María de los Ángeles Aldir: “Para el non existía o cansanzo nen o tropezo, sempre se levantaba co firme propósito de ser mellor cada día”, manifestando así o inspirador modo de vida dunha persoa que é “todo un orgullo para esta provincia e para esta Deputación”, concluíu o presidente provincial.
Olegario Vázquez Raña: “Afortunado de vivir entre dúas terras”
O Premio Ourensanía 2024, Olegario Vázquez Raña, confesaba que recibir o Premio Ourensanía “é profundamente emotivo, non só como empresario e deportista, senón como esposo, pai e amigo”. Durante o seu discurso, o homenaxeado subliñou o “traballo constante” como o “verdadeiro valor da vida”. “A disciplina constitúe soños”, engadía.
Olegario Vázquez Raña agradeceu tamén a familia, equipo e amigos a súa compañía en cada logro e desafío. “A miña vida foi un reflexo de amor e comprensión e son afortunado de vivir entre dúas terras que amo profundamente, España e México”.
O premiado fixo un repaso pola súa vida, contando anécdotas como o desexo da súa muller de celebrar a lúa de mel só se ían a Galicia, historia que arrincou sorrisos entre o público. “Este recoñecemento é moi importante para toda a miña familia”, subliñou o premiado, emocionado por recibir “a corazón aberto porque está é a terra dos meus papás e a miña propia terra. Eu debo a esta terra moitas cousas”.
Un premio con traxectoria desde 2012
O Premio Ourensanía instaurouse na Deputación para enxalzar a persoeiros vinculados coa provincia pola súa aportación á sociedade desde o seu ámbito profesional. O primeiro galardoado foi o xuiz José Antonio Vázquez Taín (2012), seguido polo arcebispo de Belcastro, monseñor Francisco José Rodríguez Carballo (2013); a xornalista Victoria Prego (2014); a presidenta da Fundación Barreiros, Mariluz Barreiros (2015); o cineasta José Sousa (2016); o lendario porteiro do Real Madrid, Miguel Ángel González (2017); en 2018 o Premio Ourensanía foi compartido para o Centro do Partido do Carballiño en Bos Aires e o Centro Ourensán de Montevideo; o xornalista e escritor Alfonso Sobrado Palomares (2019); a directora do departamento de Saúde Pública e Medio Ambiente da Organización Mundial da Saúde (OMS), María Purificación Neira González (2020); o presidente do Comité Olímpico Español (COE) Alejandro Blanco (2021); o fotógrafo Manuel Outumuro (2022); e o deseñador e modisto Adolfo Domínguez (2023).
Fotos e vídeo: O SIL.
