A primeira edición de Impact Campus, que se desenvolvía na pasada fin de semana en San Xoán de Río e na Estación de Montaña de Manzaneda, deixa “unha experiencia de convivencia: proxectos concretos nados de escoitar ao pobo, convivir coa súa realidade e traballar xunto á súa xente”, segundo os seus promotores. Durante catro días, máis de 100 persoas procedentes de 19 cidades e 9 comunidades autónomas reuníanse para abordar cuestións como a mobilidade e a vivenda.
“Lonxe de expor solucións desde fóra, a proposta partiu dunha premisa clara: para transformar o rural primeiro hai que comprendelo desde dentro. Por iso, os participantes conviviron con veciños, coñeceron a historia, a cultura e as dinámicas do municipio e traballaron sobre problemas reais do día a día. Esa conexión directa con San Xoán de Río permitiu abrir unha mirada máis precisa, máis humana e máis útil sobre como deben abordarse os retos destas zonas”, din dende a organización.
Pero Impact Campus non só serviu para activar ideas, “senón tamén para demostrar o valor da convivencia, da boa xente e da conexión entre territorio e investimento. A experiencia reuniu a perfísmoi diversos unidos polas ganas de achegar e atraeu ademais a investidores como RaúlSánchez, director do fondo de Impacto Social de Cofides, e a Leo Gutson e David Espeso, de ImpactAngels de Bolsa Social que visitaron a aldea de Castiñeiro, reforzando a idea de que senactivación económica tampouco é posible reactivar a vida nas aldeas”.
Dese proceso xurdiron varias iniciativas con vocación de continuidade. No ámbito da mobilidade, xurdía MÓVETE RÍO, unha proposta de transporte baixo demanda para conectar a veciños e aldeas con servizos básicos e núcleos próximos, apoiada por voluntariado e reforzada pola futura cesión de tres vehículos eléctricos por parte de KIA.
No reto de vivenda, expúxose ENTRE NÓS, unha proposta para transformar inmobles baleiros nun modelo de co-housing interxeracional, capaz de mellorar a vida das persoas maiores, reducir a soidade non desexada e, ao mesmo tempo, atraer a mozas, emprendedores ou universitarios interesados en vivir nun pobo. Desta liña naceu tamén “Vén a probar un pobo”, enfocada en estancias temporais para experimentar a vida rural, e RURAL VALLEY, un proxecto para converter o albergue de San Xoán de Río nun espazo de innovación e emprendemento con impacto positivo.
A experiencia deixou ademais sinais inmediatos de impacto real: máis de 20 universitarios de máis de 10 universidades españolas comezaron a organizar unha nova iniciativa vinculada ao municipio, e varias persoas, incluída polo menos unha familia, manifestaron o seu interese en trasladarse a vivir a San Xoán de Río tras coñecer de cerca a súa realidade.
Carmen Pino e Tomás Garnelo, cofundadores de Impact Social Cup e impulsores de Impact Campus, destacan, tras a clausura do encontro, que están” totalmente sorprendidos co que pasou esta fin de semana. Superou completamente as nosas expectativas e cremos que estamos ante un modelo cun potencial absolutamente espectacular para cambiar realidades de verdade en toda España”.
Esta convivencia de persoas e entidades do ecosistema emprendedor desenvolvíase da man da Deputación de Ourense, do Concello de San Xoán de Río e de Impact Social Cup, un dos movementos de emprendemento de impacto positivo máis relevante de España e Europa.
Fotos cedidas.