Nas últimas eleccións municipais, celebradas en 2023, o PSdeG PSOE e Somos O Bolo selaban un pacto de alcaldía rotatoria, segundo o cal o socialista Alberto Vázquez gobernaría os dous primeiros anos e o independente Miguel Ángel García, os dous segundos. Cumprido o prazo neste mes de xuño O Bolo cambiará de alcalde.
O martes día 17 tiña lugar o pleno de renuncia do ata o de agora rexedor, Alberto, e o vindeiro luns día 23 ás 12 horas celebrarase o de toma de posesión de Miguel como novo alcalde do Bolo, cumprindo co pacto.
Nestes dous anos de goberno socialista, cumpríronse con varios proxectos. “Un dos principais era a reconstrución da ponte de Barxa e aí está, ademais de arranxar estradas e dar a coñecer as potencialidades do municipio con actividades tanto no Santuario das Ermidas como no Castelo ou no Museo de Yosso”, indica o alcalde saínte, incluíndo as novidades que introduciron como a Feira Irmandiña e a renovada Festa da Vitela, dando un importante pulo aos produtos e produtores locais.