O premio Ourensanía deste ano 2016 xa ten nome: o produtor de cine José Sousa será o recoñecido nesta ocasión. Así o fallou o xurado, reunido na mañá do 14 de outubro no Pazo Provincial baixo a presidencia de Manuel Baltar, para destacar a súa “longa carreira cinematográfica en Venezuela”. A entrega deste galardón que concede cada ano a Deputación de Ourense terá lugar nunha gala no Teatro Principal o vindeiro 11 de novembro, coincidindo co día de San Martiño, patrón da cidade.
Sousa naceu no lugar de Ver, en Ramirás e, tras anos de traballo, conseguiu colocarse entre as primeiras produtoras cinematográficas en Venezuela e facerse nome imprescindible dentro da industria do país latinoamericano. “Centos de producións audivosiuais, curtametraxes, documentais, spots publicitarios realizados ao longo das tres últimas décadas, se ben o seu prestixio como cineasta aséntase na implicación en preto de 40 longametraxes”, din dende o ente provincial. Asinou títulos como “El manzano azul”, “Reverón”, “El malquerido” ou “La casa del fin de los tiempos”. Ademais, representa a cara da emigración, tan recoñecida na provincia.