Conta atrás para a XLI Feira do Viño de Quiroga. Como preludio desta mostra, que se desenvolverá na fin de semana do 8 e 9 de abril, a Confraría do Viño de Quiroga anunciaba este mediodía a proximidade deste evento e facíao co seu tradicional desfile pola rúa Real da vila.
Ás doce e media do mediodía os confrades, ataviados co seu traxe de gala (capa de cor burdeos e sombreiro negro), acompañados do Grupo de gaitas O Recanto, recorrían a travesía principal da localidade, dende a Casa Consistorial ata o Museo Etnográfico de Quiroga.
Este solemne acto -que preside o Confrade Maior, o alcalde quirogués Julio Álvarez, e o presidente da Confraría, J. Manuel Rodríguez-, forma parte dos prolegómenos da Feira do Viño de Quiroga dende o ano 2012, ano no que se fundou esta congregación.
Como remate do desfile, xa a porta pechada, os membros do gremio realizaban unha asemblea anual nas instalacións do Museo Etnográfico. Sobre a mesa estaba a reforma dos estatutos da confraría e a convocatoria das prazas vacantes. Ata o de agora os membros soamente se renovan cando queda algunha das 23 prazas vacante, como ocorreu no ano 2019 cando entrou a formar parte desta institución a primeira muller confrade.
