O Salón de actos da Universidade Europea de Madrid acollía o 25 de xaneiro o acto de entrega dos recoñecementos académicos do Curso 2024, coa asistencia das máximas autoridades académicas, catedráticos, profesores, novos doutores, e familiares.
No transcurso do mesmo, a reitora, Elena Gazapo Carretero, procedía á imposición dos correspondentes birretes e medallas aos novos doutores das distintas facultades: Medicina, Dereito, Veterinaria, Filosofía, Maxisterio, Fisioterapia, CAFID, etc.
Entre eles atopábase o profesor da facultade de Ciencias da Actividade Física e o Deporte, Carlos Revuelta Parra, natural do Barco de Valdeorras, cuxa tese titulada “Factores fisiolóxicos e de rendemento en ciclistas de diferentes categorías”, xa fora destacada en xuño coa cualificación de sobresaliente “Cum laude”.
A continuación, dábase lectura ao nome do novo doutor que recibiría o premio extraordinario do doutoramento, entre todos aqueles que realizaron a lectura da súa tese doutoral ao longo do pasado ano, independentemente da facultade á que pertencesen. Este recoñecemento recaía finalmente no profesor valdeorrés Carlos Revuelta.
Este doutor cursou os seus primeiros estudos no Barco, para formarse posteriormente e xa como universitario, en Pontevedra, O Porto e Madrid. Na Universidade Europea, realizou o Máster no alto Rendemento, do que agora é director, e desde fai seis anos é profesor da mesma.
Ao remate da cerimonia entoábase por parte de todos os asistentes o coñecido himno universitario “Gaudeamus igitur”.
Fotos cedidas.