Primeiro partido de liga e derbi. Dous alicientes que facían do partido de fútbol sala disputado na tarde deste domingo 13 de setembro no pavillón municipal de Calabagueiros, un evento deportivo especial con moitos afeccionados nas bancadas.
E non era para menos. Na pista de xogo dous rivais de nivel na Preferente Futgal sénior de fútbol sala. Como local, o Pizarras Tres Cuñados FS que se mantiña na categoría tras a pasada campaña; e como visitante o Vianariño FS, descendido da Terceira nacional polos arrastres de última hora malia ter case asegurada a salvación.
Un partido que prometía emoción, xogo e ritmo, sen defraudar o máis mínimo, resolvéndose co 3-6 a favor dos vianeses. Así e todo, eran os locais os que se adiantaban no marcador cun temperán gol de Moha xa no minuto 1; os visitantes respondían co gol de Ígor no minuto 5, ao que seguían dous de Borja, no 8′ e no 18′. Xa na segunda parte, José recurtaba diferenzas no 23′, pero no minuto 26 Macía volvía marcar para o Vianariño, seguido de Borja que marcaba o seu terceiro gol no 35′ poñendo o 2-5. As cousas non quedaban aí e no 37′ Roi marcaba o sexto gol para o Vianariño e no 40′ Hamza o terceiro para o Tres Cuñados.
Con este resultado, os vianeses sitúanse no segundo posto da clasificación e xogarán o seguinte partido na casa, no pavillón municipal de Viana do Bolo contra Pazos de Borbén “B”; mentres que os valdeorreses quedan no 14º e xogarán a domicilio contra o Bembrive FS.
Fotos e vídeo: Mónica G. Bellver.