Con música arrinca a VIII Mostra do Patrimonio Inmaterial de Trives, que promove a Asociación Cultural A Caniceira. Tras a antesala da actuación “A volta ao mundo en 80 días” en mans do ximnasio trivés, dase paso na xornada do vernes 12 de agosto aos V Cantos de Taberna coa participación de ata oito “grupos festeiros”: As Porcas Bravas (Ourense), Macizas Centrais (Trives), Mamuxos (Ourense), Manzaneda Banda (Trives), O Mariachi da Taberna (Trives), Rondalla Esmorga (Trives), San Nordés (Trives) e Somosche d’herbas (Castro Caldelas). Algúns deles son xa habituais desta cita trivesa.
O programa dos Cantos de Taberna principiará ás 20:30h. coa reunión dos grupos participantes na praza do Pilón da vila. A partires das 21:05 comezará o traxecto festivo pola ducia de “tabernas festeiras” participantes nesta edición: Ardora, Bodegón, Boliche, Cafeto, Cantina do 4, Casanova, Manolo’s, Paiño, Quintela, San Martín, Sky e Troula.
Ao remate do circuíto musical os participantes voltarán a xuntarse, desta volta na praza do Reloxo, para festexar xuntos o remate dos cantos cunha gran foliada.
