Dous meses despois das primeiras escavacións realizadas nos campamentos da guerrilla antifranquista da denominada “Cidade da Selva”, os materiais localizados polos arqueólogos volven a Casaio (Carballeda de Valdeorras) para ser expostos nas antigas escolas desta localidade. A Cidade da Selva era un dos puntos centrais de articulación da resistencia antifranquista nestes montes valdeorreses.
Así dende o vindeiro luns 24 de setembro ata o domingo día 30 o equipo de investigadores de Sputnik Labrego (sputniklabrego.com) analizará os materiais arqueolóxicos atopados. Estas escavacións centráronse en tres dos chozos que conforman os distintos campamentos guerrilleiros da Cidade da Selva e “ofreceron unha importante cantidade de material arqueolóxico”, segundo o equipo. Estes restos serán agora analizados por expertos de diversas universidades de Galicia, País Vasco e incluso de Brasil.
“O material recuperado foi sorprendente e a súa análise exhaustiva permitiranos extraer moita e valiosa información sobre a vida cotiá da guerrilla durante os anos 40”, afirman Alejandro Rodríguez e Carlos Tejerizo, coordinadores da intervención.
A análise dos materiais que se levará a cabo en Casaio acompañarase dunhas xornadas de portas abertas para que o público interesado poida “non só ver o material, senón tamén comprobar os avances no seu estudo en tempo real”, indican dende Sputnik Labrego. Entre o día 23 e 30 de setembro o horario para as visitas será de 10 a 14 horas e de 16 a 20 horas. Estes avances poderán ser consultados igualmente na páxina de Facebook do proxecto.
