A cidade de Ourense súmase ás protestas que durante toda a xornada do mércores 26 de outubro se sucederon por todo o territorio nacional en contra das reválidas e da Lomce. Os protagonistas: profesores, pais e alumnos, cunha alta participación por parte destes últimos na concentración convocada nos Xardíns do Padre Feijóo. Alí se deron cita a media tarde ducias de rapaces e profesores que ergueron xuntos a voz ao grito de “Nin reválidas nin Lomce”. Posteriormente tamén houbo unha marcha polas principais rúas da vila, que, xunto coa protesta dos traballadores do Banco Pastor por un ERE, alteraron a calma habitual das tardes na cidade, incrementando o labor de vixiancia das Forzas e Corpos de Seguridade e a presenza da Policía Local para regular o tráfico.
