Un dos actos máis emotivos da derradeira xornada do Galicia Fórum Gastronómico, neste 25 de marzo na Coruña, era a entrega dos Premios Picadillo, presidida polo conselleiro do Mar. Entre os galardoados nesta edición estaba, na categoría de produtor a Panadería Caneda da Pobra de Trives. Este establecemento elabora a famosa Bica de Trives desde 1899, máis de cen anos de tradición, entre outros produtos como o pan fresco diario, empanadas artesás, repostería ou tartas especiais.
Caneda era unha das 8 Panaderías Históricas de Galicia distinguidas, xunto a Panadería Pallares (Sarria, Lugo, 1876); Panadería Germán (Fisterra, A Coruña, 1870); Panadería Rabizas (Betanzos, A Coruña, s XVII); a centenaria Panadería Paleo (Ribadeo, Lugo); Forno do Calviño (San Cristovo de Cea); Sieira Charlín (Ribeira, A Coruña, 1884) e Panadería Central (Buño, Malpica).
Tamén lle foron outorgados galardóns a Celestina Martínez, de O Parrulo (Ferrol), na categoría Cociña; na categoría Sala, o premiado foi Berto Domínguez, á fronte do mítico restaurante D’Berto (O Grove); na categoría Viño, o premio foi para Joaquín Álvarez “Quin”, de O Rosal; en canto á categoría Produtor, no caso de Mar, o recoñecemento recaeu en O Peirao – Federación Galega de Redeiras Artesás (Malpica de Bergantiños), mentres que no apartado Rural o premiado foi Jesús Simal Gándara.
Galicia Fórum Gastronómico pechaba a súa décima edición lembrando que volverá en marzo de 2027 e reafirmando, en palabras da súa directora, Ana Trevisani, o seu compromiso “de mostrar a riqueza do produto, visibilizar o labor dos produtores e das empresas do territorio galego, e o talento dos nosos cociñeiros”, así como de “traer a Galicia empresas e cociñeiros de ámbito internacional”.
“O noso obxectivo é que o Fórum siga sendo o gran escaparate do sector Horeca e un xerador de negocio para as empresas galegas”, sinalou, “e empezaremos a traballar xa en breve para conseguilo”.
Galicia Fórum Gastronómico despediuse esta tarde coa satisfacción de superar as súas expectativas, ao rexistrar unha afluencia de máis de 23.000 visitantes.
Fotos cedidas.
