Un gran estrondo sobresaltaba nesta tarde-noite, arredor das 20:30h., á veciñanza de Valencia do Sil (Vilamartín de Valdeorras). Por motivos que se descoñecen rebentaba a comporta central da presa de Santiago, situada nesta localidade, sendo arrastrada augas abaixo.
No intre de escribir estas liñas, o encoro está completamente baleiro pero, segundo as primeiras informacións, o río non se saíu do seu cauce e, que se saiba, non se produciron danos.
Iso si, o enorme ruído causado ao rebentar a comporta asustaba aos veciños de Valencia do Sil. Algunha testemuña mesmo o describía como “se fora un caza que se estrelara”.
En canto se teñan máis datos, ampliarase información.
Fotos: Carlos G. Hervella.
