A Escola Oficial de Idiomas (EOI) de Ponferrada acollerá o vindeiro martes 18 de febreiro a presentación do Dicionario do Galego do Bierzo, da autora Sara Rodríguez Fernández e editado pola Universidade de Vigo. O evento terá lugar no salón de actos deste centro.
Será unha actividade aberta a todos os públicos, en lingua galega e de carácter gratuíto. Sara Rodríguez Fernández, natural de Carracedelo, comezou este proxecto como parte do seu TFG (Traballo de fin de grao).
Inspirada polo Dicionario do Galego de Asturias, a obra da berciana esgotouse en tres meses tras a súa publicación. A través dun traballo exhaustivo, o dicionario recolle e documenta o vocabulario característico da variante do galego do Bierzo incluíndo un total de 15.000 termos.