Na Praza da Igualdade da Pobra de Trives xa locen os dous novos bancos morados con mensaxes feministas instalados con motivo do 8M. Con esta actuación, o Concello pretende “reivindicar os dereitos dan mulleres neste espazo tan significativo no que xa podía verse dende o 2021 un mural pintado por Mamen Bazarra, La niña del arcoíris, en recordo ás vítimas de violencia de xénero”, indican dende o grupo de goberno local.
A inauguración levarase a cabo mañá, 8 de marzo, a partir das 12.00 horas. Nos bancos poden lerse mensaxes de Eduardo Galeano e Simone Weil. Tamén se instalará unha pancarta conmemorativa e alumeado violeta na Casa do Concello para dar visibilidade á loita pola igualdade.
A programación do 8M elaborada polo Concello da Pobra de Trives estenderase durante a fin de semana. O sábado 9 de marzo, a partir das 19.00 horas, ofrecerase no Auditorio o monólogo de Hermen e Hildo, para todos os públicos a partir de 3 anos.
O domingo 10 de marzo levarase a cabo a proxección e o coloquio do documental “Amanezca” de Lucía Álvarez. Será no Auditorio a partir das 19.00 horas.
Con esta programación o Concello da Pobra de Trives pretende seguir traballando “en favor da igualdade e dar visibilidade a unha loita que debe implicar a toda a sociedade”. Por iso anímase a toda a poboación a participar no programa de actividades.
