A Deputación de Lugo vén de anunciar en rolda de prensa a segunda edición da Iniciativa de Viños de Lugo, un evento deseñado para promocionar os viños locais e achegalos tanto aos profesionais do sector como ao público xeral. Na presentación deste evento participaban Pilar García Porto, deputada provincial de Lugo; e Luis Paadín, experto vitivinícola e impulsor da iniciativa.
Pilar García Porto destacou o compromiso da Deputación de Lugo co impulso ao sector vitivinícola local, afirmando que “a Iniciativa de Viños é unha aposta firme pola economía local e o recoñecemento da calidade dos nosos viños, que merecen unha proxección nacional e internacional”.
Pola súa banda, Luis Paadín, técnico en Vitivinicultura e Enoloxía e autor da recoñecida Guía de Viños, Destilados e Adegas de Galicia, expresaba o seu agradecemento cara á Deputación, resaltando a importancia desta colaboración para o sector. “Unha vez máis, a Deputación de Lugo demostra a súa clara aposta polo sector vitivinícola da provincia e o potencial dos viños de Lugo para alcanzar novos mercados”.
Unha cata única aberta ao público
O evento, que se celebrará o próximo 15 de novembro no Palacio de San Marcos, ofrecerá unha experiencia exclusiva de cata con máis de cen viños da provincia, procedentes da D.O. Ribeira Sacra e a IGP Terras do Navia.
Esta xornada dividirase en dúas partes: unha primeira sesión para profesionais e medios de comunicación, na que Paadín estará acompañado por Frédéric Galtier, xornalista e consultor internacional de viños, quen achegará a súa experiencia como representante en España do prestixioso Concurso Mundial de Bruxelas. Ambos expertos analizarán as tendencias e oportunidades para os viños de Lugo nos mercados nacionais e internacionais.
O túnel de viños aberto ao público permitirá aos asistentes coñecer e valorar unha ampla selección dos viños da rexión nunha experiencia sensorial completa e educativa. Trátase dunha oportunidade sen precedentes para catar e descubrir máis de cen viños da provincia nun só lugar.
Un kit de catador sostible e un caderno de cata exclusiva para os asistentes
Cada asistente recibirá un kit de catador elaborado con materiais sostibles, que inclúe unha copa de cristal individual e un caderno de cata especialmente deseñada para esta acción. O caderno contén información detallada de cada un dos viños dispoñibles no túnel, permitindo aos asistentes puntualos e rexistrar as súas preferencias, o cal facilitará a elección dos seus viños favoritos en futuras compras.
Con esta segunda edición, a Deputación de Lugo reafirma o seu “compromiso co impulso e a proxección dos viños da provincia, brindando un espazo onde produtores, expertos e o público xeral poidan conectarse e celebrar a riqueza vitivinícola da rexión. Esta iniciativa non só apoia a economía local, senón que tamén reforza a sustentabilidade e a calidade dos viños de Lugo, posicionándoos como produtos de excelencia”, asegura o organismo provincial.