Dende o ano 1972 a famosa Bica de Trives ten a súa propia festa de exaltación, unha cita gastronómica que este ano retrásase unha semana con respecto ás anteriores edicións. Así o sábado 2 de agosto, a Finca da Barreira de Trives acollerá o xantar popular da XLII Festa da Bica.
O xantar comezará a partires das 14h. e malia que o doce e manteigado postre será o protagonista, previamente servirase un completo menú a base de empanada de carne e tamén de bacallau, tenreira galega (tenreira ecolóxica de razas autóctonas producida por BIOCOP-Sociedade Cooperativa Galega-), con pementos e patacas, bica e licor café. O prezo da entrada será de 13 euros por persoa.
O xantar estará amenizado musicalmente por un pasarrúas a cargo da Banda de Gaitas Os Trintas. E xa pola tardiña, haberá baile a cargo do dúo Colores.