Na tarde deste martes 17 de outubro os cativos do CEIP Xosé Manuel Folla Respino de Vilamartín de Valdeorras recibían unha grata sorpresa. Despois de xantar, recibían no salón de actos a dous empresarios locais, o taxista Rubén e o fontaneiro Adrián, que lles entregaban unha camiseta a cada un. Unha camiseta coa imaxe do colexio por diante e o logo das empresas por detrás, que servirá como modelo a unha interesante e orixinal iniciativa de apoio ao colexio.
Tal como explica Claudia Núñez, nai dun futuro alumno do centro escolar, a iniciativa, nacía por parte dos dous empresarios, Rubén de Tanke Taxi e Adrián de Fontanería e Calefacción Ben Posta e da ANPA para promocionar os seus negocios e ao mesmo tempo colaborar co colexio.
Cada alumno recibía hoxe a súa propia camiseta pero a idea da ANPA é facer estas camisetas para vender “e conseguir que se sumen outros empresarios do municipio xa de cara ao ano que vén para recadar cartos para o colexio e poder facer actividades para os nenos”, di Claudia, explicando que “con tan poucos nenos pódense facer moitas cousas con pouco diñeiro pero hai que telo e esta á unha boa forma de conseguilo”.
Dende o Concello, Claudia Núñez e Sherezade Núñez tamén colaboran con esta iniciativa.
Fotos cedidas.