É un dos tres foxos de lobo con tipoloxía en cruz que están documentados no mundo. Situado en Ardexaxe, o Foxo de Lobo de Entre Cabezas é unha monumental trampa, de orixe medieval, con catro paredes de máis de cen metros que converxen nun pozo de 3 m de profundidade. Era restaurada no 2019 por parte do Concello de Viana con axudas económicas do GDR SilBibeiNavea.
Esta xigantesca trampa era obxecto dunha visita neste sábado 21 de setembro, dentro do proxecto “Sábeme a… Viana do Bolo”. O percorrido era guiado e interpretado por Gema Seara. O foxo atópase entre as Tetas de Ardexarxe, dende onde os participantes (chegados de diferentes partes de Galicia) desfrutaron de espectaculares panorámicas dos vales do Conso, o Bibei e o Cenza e as Serras de Queixa e O Canizo, entre outras.
Despois, tiña lugar unha degustación de produtos locais, que era preparada e presentada polo restaurante O Callejón, tamén cun mercadiño de produtos locais. Posteriormente realizouse unha visita guiada á vila de Viana con interpretación da súa historia e os seu edificios máis singulares.
Fotos cedidas.
