Esta tarde dábanse a coñecer e entregábanse os galardóns da segunda edición do certame trienal “Premio de Construción Sostible con Lousa”, que convoca o Clúster da Pizarra de Galicia, nun acto celebrado na sede da Confederación Empresarial de Ourense (CEO) na capital da provincia.
Este galardón, que acada a súa segunda edición, recoñece as obras arquitectónicas máis significativas realizadas con lousa galega, un material emblemático que impulsa a sustentabilidade e a internacionalización do sector. Ademais, forma parte do Plan de Promoción da Agrupación industrial dá Lousa, centrado en arquitectos e arquitectos técnicos como prescritores clave no ámbito da construción.
Tres eran os galardóns outorgados nesta ocasión: un premio na categoría de Mellor Cuberta e outro na de Mellor Fachada, ademais dun accésit.
Obra gañadora na Categoría de Mellor Cuberta: Edificacións Núcleo de Candeda
Arquitecto: Marcos Domínguez de Diego, TECSENPLAN S.L.P.
Promotor da obra: Concello de Carballeda de Valdeorras
Colocador: DINOR, S.L.
No intre de recoller o galardón, o autor do proxecto, Marcos Domínguez, dedicáballe este premio aos “todos os propietarios destas edificacións afectadas polos incendios, que foron os que realmente sufriron ese gran problema que houbo en Valdeorras no verán do 2022 e, por suposto ao Concello de Carballeda, que a través de María Carmen, a súa alcaldesa, promoveu esta solución ao problema que tiñan enriba”. Tamén explicaba a idea “era a resolución mediante tradicionais do lugar, e foi o que buscamos” e que se axustaron bastante os custos, “houbo que facer moitísimos números e tamén moitísimas visitas de obras para intentar que chegaran a bo término”.
Obra gañadora na Categoría de Mellor Fachada: Nova Adega de Virgen del Galir en Éntoma.
Arquitecto: Ramiro Domínguez Real, ACOVAL
Promotor da obra: VIRGEN DEL GALIR, S.L.U.
Colocador: CUBIERTAS HERMANOS BLANCO, S.L.U
Tras agradecer o recoñecemento, o arquitecto Ramiro Domínguez indicaba que “o resultado desta ampliación parte da idea de utilizar a lousa xa que o viño, as cepas de Valdeorras, polo menos as desta adega, teñen substrato louseiros, pois pensamos que era bonito tamén a idea de metelas tamén dentro dun berde de lousa para que madurara. Esa idea foi posible por unha serie de persoas arredor que a impulsaron e permitiron que chegara a termo, os técnicos, a empresa construtora e o propio promotor tiveron especial interese en que fose así. E agora pretenden remozar o resto das edificacións coa mesma estética”.
Obra galardonada cun Accésit: Albergue de Sobradelo
Arquitecto: Marcos Domínguez de Diego, TECSENPLAN S.L.P.
Promotor da obra: Concello de Carballeda de Valdeorras
Colocador: CUFA, Obras y Proyectos, S.L.
O presidente do Clúster da Pizarra de Galicia, Víctor Cobo, destacaba “a riqueza arquitectónica das obras presentadas a concurso e a utilización orixinal, sostible e integradora” que se facía da lousa “chamaba especialmente a atención do xurado e dos membros do clúster. Son cualidades que non só cumpren con creces os criterios da bases de participación neste premio senón que contribuíron a obtención dos galardóns aos seus arquitectos, promotores e colocadores”.
Cobo facía unha mención especial á obra de rehabilitación do núcleo rural de Candeda, galardonada co premio á Mellor Cuberta, “polo compromiso adquirido polo clúster para a súa reconstrución”. Neste proxecto reconstruíanse tres vivendas arrasadas polo incendio forestal de agosto de 2022. Presentes no acto de entrega de premios estiveron os veciños desta localidade, cuxas casas se reconstruír despois dos graves danos causados polo incendio.
No acto de entrega de premios contábase, entre outras autoridades, coa presidenta da CEO, Marisol Nóvoa; a alcaldesa de Carballeda de Valdeorras, María Carmen González, en representación do seu Concello, promotor de dúas das tres obras premiadas; o delegado da Xunta en Ourense, Manuel Pardo e, ademais o acto, o director xeral de Planificación Enerxética e Minas, Pablo Fernández Vila.
“Este é un premio de solidariedade”, dicía a alcaldesa de Carballeda de Valdeorras, agradecendo a distinción do clúster, “que vai marcar a numerosas persoas”. E lembraba que cando “esta zona se declarou zona catastrófica, o goberno da Xunta con todo o persoal que traballou no núcleo de Candeda e de Valdeorras, entón este é un premio ao que cando hai unha gran desgraza están as institucións o que a natureza destruíu e este premio tamén é para eles. Polo tanto, estou feliz”. E concluía resaltando que, “como dixen neste mesmo foro hai moitos anos, a lousa non é destrución, é beleza, é progreso e agora tamén é solidariedade, polo tanto, parabéns aos meus veciños tamén e aos técnicos”.
A presidenta da CEO, Marisol Nóvoa, sinalaba que “dende esta confederación reafirmamos o noso compromiso e apoio ao sector da lousa, unha motor clave para a economía da provincia de Ourense, xerador de emprego e riqueza, e un dos maiores representantes da nosa identidade no mercado nacional e internacional”, así mesmo daba o “parabén aos galardoados polo seu talento e compromiso coa construción sostible”.
O xurado
Cinco membros formaban parte do xurado encargado de seleccionar as obras galardoadas nesta edición do premio: o delegado en Ourense do Colexio Oficial da Arquitectura Técnica, a delegada en Ourense do Colexio Oficial de Arquitectos de Galicia, o xerente da Asociación Provincial de Empresarios da Construcción de Ourense, o secretario xeral da Confederación de Empresarios de Ourense, e o xerente do Clúster da Pizarra de Galicia.
Pablo Fernández: “Este premio era moi necesario”
No peche do acto, o director xeral de Planificación Enerxética e Minas, Pablo Fernández, felicitaba aos galardonados e aseguraba que este acto “era moi necesario”, ademais de sinalar que “dende a Xunta de Galicia, especialmente durante as últimas semanas estamos demostrando de forma fehaciente que este apoio ao sector non é só de palabra, senón tamén dunha maneira clara práctica e real e temos que seguir nesa liña”.
“As tres obras premiadas”, engadía, “son un claro exemplo do que pode ser a practicidade e a beleza, que se poden conseguir a través da lousa, un material natural que ten moitísimas vantaxes. E ademais de felicitarvos, hai que darvos as grazas por ser ese escaparate que pode supor unhas obras de arquitectura como son as vosas para un material tan importante como é para nós a lousa”. Tamén tiña palabras para a alcaldesa, a quen felicitaba “non só polo premio, senón por traer aos veciños”, e pedía un aplauso para todos eles.
“A lousa ten que aportar un valor diferencial en Galicia, na provincia de Ourense, o que fai é fixar poboación no rural, dinamiza a nosa economía, as nosas comarcas, é un motor económico fundamental, ten unha clara vocación exportadora, representa o 27% das exportacións na provincia de Ourense e, ademais, xera moitísimo emprego e un 25% é feminino”, resaltaba Fernández Vila, animando ademais aos arquitectos para seguir impulsando e apoiando a lousa nas súas obras.
Fotos: O SIL, agás as últimas dúas da galería
Vídeos: O SIL.