Ata Valdeorras desprazábase este mediodía o ministrio de Agricultura, Pesca e Alimentación, Luis Planas, para coñecer sobre o terreo as consecuencias dos devastadores incendios de agosto nas explotacións vitivinícolas da zona. En concreto visitaba as viñas de Alan de Val, unha adega da Rúa, afectada de maneira considerable polos lumes. No decurso desta visita, trasladaba “todo o apoio do Goberno de España aos afectados por os incendios deste verán”, ademais de reivindicar o labor de agricultores e gandeiros.
“Estes incendios non só afectan a a produción agrícola, senón á economía rural e ao traballo de xeracións de familias”, dicía Planas, resaltando ademais que o “recoñecemento ao traballo de agricultores e gandeiros ten que facerse todos os días e, ademais, poñelo en práctica a través de axudas para que o noso mundo rural teña futuro”.
O ministro anunciaba tamén que hoxe publicábase na páxina web do ministerio a ligazón á consulta pública do decreto que habilita axudas directas para os agricultores e gandeiros afectados. https://www.mapa.gob.es/es/ministerio/servicios/participacion-publica/detalle/prd-ayudas-incendios
Tamén explicaba que a norma establece dous tipos de axudas: un complemento á subvención da prima do seguro agrario, que cobre ata o 70 % do custo. E outra axuda directa para explotacións agrarias afectadas, entre 1.500 e 10.000 euros segundo ingresos declarados, cun mínimo de 6.000 euros para asegurados que declarasen sinistro. Todas estas axudas tramitaranse de oficio e abonaranse antes do 31 de decembro de 2025. ” Publicaremos a lista de resolucións para que, se hai algunha reclamación ou aclaración, se poida facer e imos abonar antes de final de ano esas axudas directas, que son complementarias das da Xunta e do seguro agrario”, matizaba.
O ministerio de Agricultura apuntaba tamén que nunha situación de emerxencia polos incendios como a vivida en Valdeorras e na provincia en agosto, “o problema non é só a perda física, o que é destruído, senón o esforzo, o cariño como hai un momento estábannme explicando ao ver o lume tan cerca da túa casa, da túa explotación, do teu viñedo… Iso ten un efecto psicolóxico, de sentimento, terrible, e estas axudas son unha pequena contribución para que o mundo rural teña futuro. A xente moitas veces cando merca nun supermercado non sabe o difícil que é lograr un bo filete de carne ou unha boa botella de viño, pois iso téñeno que saber. E tamén que detrás diso hai mulleres e homes realizando un traballo moi honesto e aos que temos que apoiar e este é o motivo da miña presenza aquí e por suposto visitar esta adega, a explotación, e o viñedo que foi afectado polo incendio e espero que saia adiante”.
Nesta visita o ministro estaba tamén acompañado polo subdelegado do Goberno en Ourense, Eladio Santos, así como pola alcaldesa da Rúa, María G. Albert, e pola conselleira do Medio Rural, María José Gómez, entre outras autoridades e por responsables de Alan de Val. A conselleira do Medio Rural manifestoulle o seu agradecemento ao ministro pola súa disposición para visitar Galicia e coñecer “de primeira man os efectos da vaga de incendios, que sufriu especialmente a provincia de Ourense en agosto”.
Así mesmo amosábase segura de que “o ministerio saberá entender a necesidade non só do momento, senón de cara ao vindeiro ano para recuperar eses viñedos afectados, e seguramente teremos que pór enriba da mesa outras medidas de axudas. Hoxe trasladáremoslle ao ministro esas necesidades que se nos van ir presentando xa nun segundo nivel de acción e, dende a Xunta de Galicia estamos recibindo todas as solicitudes e avaliando os danos que tiveron todos os sectores. E intentamos chegar a todos, non só aos profesionais, senón a aqueles que exercen a agricultura e a gandería como unha segunda actividade, que fan un labor esencial de soster as nosas aldeas, nesa recuperación”.
A vaga de incendios foi a máis grave de os últimos anos en España, con máis de 370.000 hectáreas calcinadas, das cales unhas 30.000 corresponden a cultivos herbáceos e leñosos, “que tardarán anos en recuperarse”. Ademais, máis de 3.000 explotacións gandeiras víronse afectadas; delas, case 2.000 tiñan pastos. Como recoñeceu o ministro, a perda de pastos supón un sobrecusto en alimentación, o que obriga a os gandeiros para adquirir pensos e forraxe. Planas lembrou que o seguro agrario é “o mellor instrumento de xestión de riscos”.
Planas recoñece que o futuro de España pasa polo noso mundo rural, “e os nosos agricultores e gandeiros son fundamentais” para garantilo.
Fotos e vídeo: Carlos G. Hervella.
