Os bombeiros do parque comarcal de Valdeorras prodecían este mediodía a cortar as ramas de dúas das palmeiras que se atopan no Paseo do Malecón do Barco, e que están enfermas por unha praga que afecta a estas árbores.
Para poder realizar estes traballos desprazábanse ata o lugar dous camións de bombeiros, con escaleira extensible, e tamén a Policía Local, que cortaba temporalmente ao tráfico a rúa Irmáns Dequidt.
As árbores enfermeron por mor dun insecto, o picudo vermello (Rhynchophorus ferrugineus), un “gurgullo asiático cuxas larvas cavan galerías no interior do tronco, debilitando e matando as palmeiras. Os síntomas inclúen follas caídas, un corazón esfiañado, buracos e a presenza de capullos, pero cando se advirten os síntomas en moitos casos xa non se pode aplicar ningún tratamento”, segundo explica o Concello.
Durante as últimas semanas retiráronse xa catro exemplares en diferentes puntos do Barco, ao comprobarse o seu mal estado e o evidente risco de caída. Un deles, na praza Academia Dequidt, retirouse despois de que caese sen causar danos. Os outros tres, na Urbanización As Palmeiras, ao comprobarse que estaban danadas e afectadas pola mesma praga.
O Concello está a proceder a inspeccionar todas as palmeiras existentes no municipio, e retiraranse as que estean enfermas. Nun futuro próximo, plantaranse árbores para substituír aos retirados.
Fotos: Carlos G. Hervella.
Vídeo cedido.
