No mediodía deste venres 24 de abril producíase un accidente mortal no que se vía implicado un único vehículo e no que falecía unha muller tras caer coa súa moto en Nogueira de Ramuín, tal como indican dende o 112 Galicia que tiña coñecemento deste accidente uns dez minutos despois das 12 horas.
“Polo que indicou o alertador, producírase unha caída de moto en Luíntra, a carón dun polígono e a persoa implicada atopábase inconsciente”. Con esta información, desde o CIAE 112 Galicia informaban ao Servizo de Urxencias Sanitarias de Galicia-061, que mobilizou ata o punto o helicóptero medicalizado con base en Ourense. “Tamén se compartiu a información co GES do pereiro de Aguiar, coa Garda Civil de Tráfico e coa Agrupación de Voluntarios de Protección Civil de Nogueira de Ramuín”, engaden dende o 112, concluíndo que logo da chegada dos servizos de emerxencia ata o lugar, “nada puideron facer por salvarlle a vida á vítima”.