A Policía Local do Concello de Ourense activará un dispositivo especial de seguridade e tráfico o vindeiro luns, día 4 de maio, con motivo do paso pola cidade da Volta Ciclista Feminina. As restricións afectarán principalmente ao sector sur do termo municipal durante a tarde desa xornada.
Cortes de tráfico e vías afectadas. Para garantir a seguridade das deportistas e do público, procederase ao corte total da circulación en dúas vías:
• Estrada de Ponte Sevilla (OU-517).
• Estrada de Seixalbo (OU-105).
O acceso a estas estradas quedará restrinxido desde a glorieta que conecta a avenida de Zamora coas mencionadas OU-517 e OU-105.
Puntos de desvío e horarios. As patrullas de servizo e a sinalización circunstancial desviarán o fluxo de vehículos en dous puntos críticos:
• Intersección da avenida de Zamora con Nosa Señora da Saínza.
• Intersección da avenida de Zamora coa Avenida da Universidade.
O horario previsto para estas restricións de mobilidade será, aproximadamente, desde as 16.45 ata as 17.30 horas. No entanto, este intervalo está suxeito á propia evolución da carreira e ás indicacións que dean os axentes no lugar.
A Policía Local fai un chamamento á colaboración cidadá e recomenda:
• Procurar rutas alternativas e evitar a contorna da avenida de Zamora e as saídas cara a Seixalbo e Ponte Sevilla.
• Anticipar traxectos para evitar posibles retencións nos puntos de desvío.
• Seguir estritamente as instrucións do persoal de Policía Local presente no dispositivo.
Autobuses urbanos
O paso da volta afectará tamén a dúas liñas do servizo de autobuses urbanos:
• Liña 3: Santa Cruz – O Cumial e
• Liña 4 Eirasvedras – Seixalbo.
Desde as 16.45 h ata as 17.30 horas farán os seus percorridos ata a Avenida da Universidade (A Cuña).