O Club Tenis Rúa xa é un equipo prateado. Ba xornada do domingo 24 de maio o club rués lograba ascender á División de Prata do tenis galego ao derrotar en semifinais á Escola de Tenis Justo ao Revés por 4-3, despois de xogar, desde xaneiro a fase de grupos, na que o Club Tenis Rúa gañou todos os partidos.
O CT Rúa empezou a disputar hai un mes a fase de ascenso a División de Prata. “Na primeira eliminatoria pasamos exentos por ser campións de grupo; na segunda eliminatoria, cuartos de final, derrotamos en Ferrol ao Casino Ferrolán por 4-3 e onte derrotamos en semifinais á Escola de Tenis Justo ao Revés por 4-3”, explica Julio López, puntualizando que ascenden a División de Prata os finalistas e o terceiro clasificado.
Con este ascenso o Club Tenis Rúa convértese “no único equipo de Ourense que competirá, o ano que vén, en División de Prata”, asegura Julio, engadindo que os demais equipos de Ourense competirán en divisións inferiores, e agradecendo, en nome do club, “o compromiso de Miguel Blanco, Bruno López, Brian Izquierdo e do noso gran capitán, Diego Blanco”, que podendo xogar en equipos “con máis nome” decidiron defender a camiseta do Club Tenis Rúa.
Doutra banda no Torneo de Primavera do Club Fluvial Lugo, dous xogadores do club proclamábanse sucampións, Uxía Gudiña en Alevín Feminino e Diego Blanco en Absoluto Masculino. Por parte do Rúa, neste torneo tamén participaban “e cunha moi boa actuación” Yago Rodríguez, Marcos Blanco, Joaquín Escuredo, Rafael Gudiña, Enzo Cao e Miguel Castro.
Fotos cedidas.