Na mañá deste luns 25 de maio presentábase en Soulecín a segunda edición do Camiño dos Fornos e das Airas, un evento cultural e gastronómico promovido pola Asociación de Veciños de Soulecín, e que terá lugar o vindeiro 6 de xuño. Ao acto asitían, o alcalde do Barco, Aurentino Alonso, a concelleira de Comercio e Turismo Alba Rodríguez e representantes da asociación, que explicaron o desenvolvemento da ruta.
Comezará ás 11 horas cunha camiñada cultural que sairá da praza de Viloira ata a aldea de Soulecín, facendo parada nos puntos da súa rede etnográfica, entre eles, A Fervenza, A Aceña, O Forno, A Aira do Fondo, A Fonte, O Lavadoiro, A Aira do Teso, A Escola, A Aira do Pico, A Aira do Santiago e A Aira dos Bolos. O acompañamento musical correrá a cargo do grupo Os Parrandas.
E xa en Soulecín, a partir das 13:30 horas, os asistentes poderán degustar doces variados e tapas salgadas, entre as que estará a empanada maravallas, o prato estrela desta festa-exaltación deste produto, nos tres fornos que forman parte da ruta xunto a outras tantas airas. Todo elo acompañarase de viños de Valdeorras e queimada. A festa contará coa actuación do grupo Doc Magoo’s ás 18 horas e máis tarde de Dj Rafa.
As entradas que estarán á venda en Zapatería Moral e Autoservicio Gavela, en Viloira, custarán 20 euros en taquilla e 17 anticipada. Os cativos ata 12 anos, 5 euros. O aforo está limitado a 350 persoas.
Fotos e vídeo: Carlos G. Hervella.