O subdelegado do Goberno en Ourense, Eladio Santos, mostrou hoxe o seu apoio ao municipio de Viana do Bolo, que sufriu danos causados polas tormentas rexistradas nas últimas horas. Xunto ao alcalde, Germán García-Ávila, o subdelegado visitou este xoves o núcleo de Bouza, un dos máis afectados polos arrastres.
O subdelegado informou ao alcalde dos procedementos que deben seguirse para acceder ás axudas habilitadas polo Estado destinadas a paliar os danos ocasionados polas tormentas. Ademais, abordaron as posibles solucións á falta de auga potable provocada polas riadas que afectaron ao municipio. Eladio Santos explicou que o primeiro paso para activar estes mecanismos de apoio é que a Xunta de Galicia declare a situación de emerxencia, requisito necesario para poder iniciar os trámites que permitan o recoñecemento da zona como gravemente afectada por unha emerxencia de protección civil.
Así mesmo, lembrou que corresponde á administración autonómica solicitar a intervención da Unidade Militar de Emerxencia (UME), en caso de considerar necesario a súa actuación. “A colaboración entre administracións é esencial para afrontar os labores de recuperación e que os núcleos afectados recuperen a normalidade o máis rápido posible”, subliñou.
Finalmente, o subdelegado trasladou ao alcalde a total disposición do Goberno para colaborar en todo o que precisen os veciños e veciñas de Viana do Bolo. “Este Goberno está sempre ao lado de quen máis o necesita”, engadiu.
