Era un dos seus obxectivos no europeo de maratón. Nel o padexeiro valdeorrés Adrián Prada Pérez lograba quedar cuarto en K1 sénior, pero non conseguía a clasificación directa para o mundial desta modalidade. Por iso preparábase para o selectivo nacional que tiña lugar a primeira hora da mañá deste 13 de agosto no río Duero en Zamora. E o resultado non podía ser mellor para este piragüista do Barco.
E, nesta competición, facíase co primeiro posto e garantía a súa praza para acudir ao Campionato do Mundo en Gualeguaychú (Arxentina). O valdeorrés, membro do Club Piragüismo Rías Baixas-Boiro, era o primeiro en cruzar a meta en K1 sénior, tras completar os 28.200 cun rexistro de 02:03:57,61. En segunda posición quedaba Miguel Lloréns (Sociedad Cultural y Deportiva Ribasella) e, na terceira, Alberto Plaza (Club Piragüas Sirio La Llongar Cangas Aventura).
Deste xeito, Adrián Prada representará novamente neste ano a España, pero desta volta no mundial que se celebrará do 22 ao 25 do vindeiro mes de outubro na Arxentina. Alí competirá no k1 Maratón Curto e K1 Maratón Longo. Esta será a terceira vez na que este padexeiro acuda a un mundial de maratón.
Fotos: loispradaf.
