A instalación de fotografía documental e participación cidadá “A Postalería da Vía da Prata” chegará o vindeiro martes 15 de setembro ao exterior do Albergue de Arenteiro, no concello de Piñor. A partir das 13 horas a instalación invitará a peregrinos, veciños e visitantes a escribir e enviar de forma totalmente gratuíta postais con imaxes do patrimonio da Vía da Prata a calquera lugar do mundo.
“A Postalería da Vía da Prata” presenta un panel expositor con 24 postais deseñadas a partir das fotografías que o fotógrafo Adolfo Enríquez (o primeiro español en lograr a Cámara de Oro dos One Eyeland Awards, un dos certames de fotografía máis importantes do mundo) realizou expresamente para esta iniciativa, un percorrido visual polas paisaxes, oficios e tradicións vinculados á Vía da Prata.
A proposta está aberta non só aos peregrinos, senón tamén aos veciños de Piñor e a quen visite o municipio. Calquera persoa poderá achegarse, elixir de forma gratuíta unha das postais, escribir unha mensaxe e enviala a calquera lugar do mundo desde a caixa de correos habilitada na propia instalación, convertendo un xesto sinxelo nunha forma de promoción directa e orgánica do patrimonio da ruta.
A de Piñor será a terceira parada desta iniciativa, que xa celebrou accións nos municipios de Monterrei e Vedra, con envío de postais a Arxentina, Estados Unidos, Colombia, Reino Unido, Francia, Alemaña ou Suíza, alén da diferentes recunchos de España.
O arquivo fotográfico xerado ao longo de todo o proxecto está ademais dispoñible de forma permanente a través dunha galería fotográfica dixital, accesible mediante o código QR incluído nas postais.