O alumnado do CEIP Antonio Failde de Coles participaba activamente no conxunto de actividades programadas pola Confederación Hidrográfica do Miño-Sil (CHMS), organismo autónomo dependente do MITECO, para conmemorar o Día Mundial da auga. O presidente da CHMS, José Antonio Quiroga, acudía á carpa situada na área recreativa de O Rial, na Peroxa, onde comprobou in situ o desenvolvemento das actividades, sendo testemuña do respecto que mostran as novas xeracións polo medio ambiente e o desenvolvemento sostible. Neste acto estivo acompañado polo alcalde de Coles, Manuel Rodríguez e polo concelleiro da Peroxa, José Manuel Rodríguez.
“Acelerando o cambio” lema de Nacións Unidas para 2023 para o Día Mundial da auga como oportunidade única na vida para unirnos en favor da auga e acelerar xuntos os avances nesta esfera, atendendo a que miles de millóns de persoas e innumerables escolas, empresas, centros de saúde, granxas e fábricas ven restrinxidas porque aínda non se cumpriron os seus dereitos humanos á auga e ao saneamento.
“Existe unha necesidade urxente de acelerar o cambio, de ir máis aló do -sigamos como ata o de agora-, de valorizar as augas, o noso importante capital hídrico, esencial para o progreso e o benestar social”.
Actividades
Os escolares aprenderon acerca da celebración do Día da auga, do coidado do medio ambiente e da importancia dos pequenos xestos diarios. “Formais parte dunha nova xeración que aprende e valoriza a riqueza natural da contorna e a necesidade de conservalo”, lembroulles agradecido Quiroga.
Estas actividades están enmarcadas dentro do proxecto “Gústame O meu Río: ensíname a coidalo”, deseñado pola CHMS, a través das que se comproba o estado do leito, presenza de macro-invertebrados acuáticos, bosque de ribeira, vertebrados asociados ao río, calidade da auga, temperatura, ph, entre outros parámetros; ademais de pautas de bo uso do recurso e da colocación dunha caixa niño para aves co obxectivo de responsabilizar aos pequenos do seu coidado, protección e vixilancia nas súas visitas a este río.
“Desde a CHMS consideramos necesario que os máis pequenos comprendan que a auga e os ecosistemas fluviais son limitados e que temos que asumir a responsabilidade e o papel do ser humano na conservación dos mesmos”, explicou Quiroga.
Por último, o presidente da CHMS unha mensaxe ao alumnado sobre a aprendizaxe e a concienciación do uso da auga “como un recurso fundamental e escaso para os ser vivos, no que debedes implicarvos por ser de vital importancia en todos os ámbitos da vida, sen auga non hai progreso, o que nos dá a clave para afirmar que a sustentabilidade é a base de todo”.
